Журнал жөніндегі ереже

Қазақстан Республикасы Жоғары Сот Кеңесінің жанындағы Сот төрелігі академиясы ректорының м.а. «19» наурыз 2025 жылғы № 05-01-03/65 бұйрығына қосымша

Ғылыми кеңестің «04» наурыз 2025 ж. шешімімен мақұлданған, № 7 хаттама

«Сот төрелігі академиясының хабаршысы» ғылыми журналы жөніндегі Ереже

Жалпы ережелер

Бұл Ереже «Сот төрелігі академиясының хабаршысы» ғылыми журналына (бұдан әрі – Журнал) қойылатын ұйымдастырушылық-техникалық және мазмұндық талаптарды анықтайды.
Журнал Қазақстан Республикасы Жоғары Сот Кеңесі Төрағасының 2024 жылғы «15» шілдедегі № 1-8/35 өкімімен бекітілген Қазақстан Республикасы Жоғары Сот Кеңесінің жанындағы Сот төрелігі академиясы Жарғысының 13-тармағының 11) және 12) тармақшаларына сәйкес шығарылады.
Журналдың құрылтайшысы және меншік иесі – «Қазақстан Республикасы Жоғары Сот Кеңесінің жанындағы Сот төрелігі академиясы» РММ (бұдан әрі – Академия) болып табылады.
Журнал Қазақстан Республикасы Ақпарат және қоғамдық даму министрлігінде (бұдан әрі – Министрлік) тіркелген, 2023 жылғы «24» ақпандағы №KZ57VPY00065448 тіркеу куәлігі, 08 тамыздағы 2024 жылғы №KZ06VPY00098570 қайта есепке қою туралы куәлік.
«Сот төрелігі академиясының хабаршысы» желілік басылымы Министрлікте тіркелген, 2023 жылғы «31» наурыздағы №KZ71VPY00067233 тіркеу куәлігі, 2024 жылғы 08 тамыздағы № KZ86VPY00098585 қайта есепке қою туралы куәлік.

Журнал рецензияланатын, қаламақы төленбейтін, ғылыми мерзімді басылымға жатады.
Журналда заң ғылымының әртүрлі салалары, соның ішінде сот билігі мен сот білімі мәселелері бойынша ғылыми мақалалар жарияланады.
Журнал жылына төрт рет баспа түрінде шығарылады. Журналдың электрондық цифрлық формасы Академияның сайтында орналастырылады.
Мақалалар қазақ, орыс және ағылшын тілдерінде жарияланады.
Автордың жеке-дара жазылған бірден көп емес мақаласы және бірлескен авторлық арқылы жазылған бірден көп емес мақала журналдың нөміріне жариялауға бір мезгілде қабылданады.

Журналдың саясаты, мақсаты мен міндеттері

Ғылыми журнал редакциясының саясаты ғылымилық, нақтылық, объективтілік, кәсіпқойлық, баспа әдебі мен академиялық адалдық нормаларын сақтау қағидаларына негізделген.
Журналдың мақсаты – Академияны қазақстандық және әлемдік ғылыми-білім беру кеңістігіне интеграциялау.
Журналдың негізгі міндеттері:

  • заң ғылымының жеке бағыттарының қазіргі жай-күйін сипаттайтын бірегей ғылыми-зерттеу жұмыстарының, теориялық және эксперименттік зерттеулердің нәтижелерін көрсететін мақалаларды, шолуларды жариялау;

  • сот қызметін қоса, құқық қолдану мәселелерін және оларды шешу жолдарын көрсетіп, ғылыми зерттеулердің нәтижелерін жариялау;

  • қазақстандық және шетелдік зерттеушілер арасында заң ғылымдарының түрлі мәселелері бойынша пікір алмасу;

  • әртүрлі ғылыми мектептер өкілдерінің өзара әрекеттесуін қамтамасыз ету;

  • қазақстандық ғалымдардың ғылыми жетістіктерін отандық және әлемдік ғылыми қоғамдастықта насихаттау;

  • жас ғылыми кадрларды ашу және ілгерілету;

  • жоғары оқу орындарымен ғылыми байланыстарды дамытуға жәрдемдесу;

  • басым ғылыми зерттеулерге ақпараттық қолдау көрсету, озық ғылыми идеяларды насихаттау;

  • жетекші шетелдік ғалымдар мен практиктермен өзара әрекеттесу және оларды жарияланымдарға, жұмыстарды рецензиялауға жұмылдыру;

  • жетекші ғалымдар мен практикамен айналысатын мамандар арасында диалог құруға және білім алмасуға арналған ақпараттық алаң ұсыну болып табылады.

Журналды басып шығаруды ұйымдастыру

Редакциялық кеңес, Редакциялық алқа және Редакция баспа стратегиясын, жарияланатын материалдардың өзекті тақбырын айқындау, Журналды қалыптастыру және басып шығару бойынша жұмысты ұйымдастырады.
Журналды басқару дара басшылық пен алқалылық үйлесімінің қағидалары негізінде жүзеге асырылады.
Редакциялық кеңес – журналдың даму стратегиясын анықтайтын алқалы өкілді орган. Редакциялық кеңесті төраға - Қазақстан Республикасы Жоғары Сот Кеңесінің Төрағасы басқарады.
Редакциялық кеңестің құрамына халықаралық және/немесе отандық дәйексөз келтіру жүйелерінде жұмыстарына сілтемелер берілген, сондай-ақ заң ғылымдарындағы жетістіктері бар отандық және шетелдік ғалымдар, сот жүйесінің өкілдері, жоғары оқу орындары мен ғылыми ұйымдардың басшылары кіреді.
Редакциялық алқа Журналдың ағымдағы редакциялық саясатын айқындайтын алқалы басқару органына жатады, Журналдың кезекті нөмірлерінің мазмұнын қарап бекітеді, материалдарға рецензия береді.
Редакциялық алқа Академия қызметкерлері, соттар, Қазақстан Республикасының жоғары оқу орындары мен ғылыми ұйымдарының өкілдерінен құрылады.
Редакциялық алқаны Төраға – Академия ректоры басқарады.
Редакциялық алқа төрағасы:

  1. Журнал жөніндегі Ережені бекітеді;

  2. бас редактордың ұсынысы бойынша Журналды «баспаға жіберуге» қол қоюға, сондай-ақ оны таратуға рұқсат береді;

  3. журналдың тарату тізімін бекітеді;

  4. Бас редактордың, Бас редактордың көмекшісінің, Редакциялық кеңес, Редакциялық алқа және Редакция құрамының кандидатураларын бекітеді;

  5. жеке мәселелер бойынша өз өкілеттіктерін Бас редакторға береді.

Редакциялық алқа мүшелері:

  • Бас редактордың тапсырмасы бойынша Журналда жариялау мүмкіндігі туралы мәселені шешу үшін қарауға ұсынылған ғылыми мақалаларды зерделейді;

  • өз ғылыми бағыты бойынша Журналға жетекші ғалымдар мен жоғары білікті мамандарды тартуға ықпал етеді;

  • Журналда жариялау үшін ұсынылған материалдарды қабылдау және қайтару мәселелері бойынша шешімдер қабылдауға қатысады.

Редакция - Бас редактордан, ғылыми бағыттар бойынша жауапты редакторлардан, Бас редактордың көмекшісінен тұратын, келесі функцияларды жүзеге асыратын, журналды басып шығару бойынша негізгі ұйымдастырушылық-техникалық құрылым:

  1. келіп түскен мақалалар мен оларға қоса берілетін материалдарды қабылдау, тіркеу және сақтау;

  2. материалдарды келіп түсетін материалдарға, Журналдың жариялау әдебіне қойылатын техникалық талаптарға сәйкестігін, сондай-ақ заңсыз алынған ақпараттың (плагиат) бар-жоқтығын тексеру;

  3. рецензиялаушы тұлғалармен өзара әрекеттесу және мақалаларды рецензиялауға жіберу;

  4. Журналдың макетін қалыптастыру;

  5. Журнал редакциясының отырысын ұйымдастыру;

  6. қолжазбаларды электрондық беттеуді, түзетуді ұйымдастыру;

  7. Журналдың басып шығарылуын қамтамасыз ету және оны кейіннен тарату;

  8. Журналды Академияның сайтында орналастыру;

  9. міндетті жіберу және жазылу процестерін ұйымдастыру арқылы журналды тарату;

  10. Журналды шығару бойынша статистикалық мәліметтерді дайындау;

  11. талқылауға ұсынылған әрбір материалға қатысты шешім қабылдау кезінде Редакция рецензиялаушылардың пікірін ескереді.

Бас редактор Журнал редакциясын басқарады, жалпы басшылықты жүзеге асырады және Редакциялық кеңестің, Редакциялық алқа мен журнал Редакциясының жұмысын үйлестіреді. Өз өкілеттіктерін жүзеге асыру кезінде Бас редактор қолданыстағы заңнаманы және осы Ережені басшылыққа алады.

Бас редактор:

  • Журналға жалпы басшылық етеді;

  • Журналға жариялауға жетекші ғалымдар мен жоғары білікті мамандарды тарту бойынша жұмыс жүргізеді;

  • Редакциялық кеңестің сандық және сапалық құрамы бойынша Редакциялық алқаның төрағасына ұсыныстар береді;

  • мақалаларды қабылдау жұмысын ұйымдастырады;

  • Журналда жариялау үшін ұсынылған материалдарды қабылдау және қайтару мәселелері бойынша шешімдер қабылдайды;

  • мақалаларды рецензиялау жұмысын ұйымдастырады;

  • ресми сайттағы журнал туралы ақпараттың уақытылы жаңартылуын қамтамасыз етеді.

Ғылыми бағыттар бойынша жауапты редакторлар:

  • өз ғылыми бағыты бойынша Журналға жетекші ғалымдар мен жоғары білікті мамандарды тартуға ықпал етеді;

  • авторлар мен рецензенттерді өздерінің ғылыми бағыттары бойынша жариялауға тартады;

  • өзінің ғылыми бағыты бойынша Журналдың Бас редакторымен журналдың ғылыми деңгейі және оның барлық құрамдас бөліктері үшін жауапкершілікті бөліседі;

  • жарияланатын материалдар мен мақалалардың мазмұны, олардың тиісті ғылыми бағыттар бойынша өзектілігі мен жаңалығы үшін жауап береді;

  • журналдың кезекті нөмірін өзінің ғылыми бағыттары бойынша жарияланымдармен қамтамасыз етеді.

Бас редактордың көмекшісі – журналдың кезекті нөмірінің шығарылымына ұйымдастырушылық-техникалық қолдау көрсетеді.
Бас редактордың көмекшісі қолжазбаны «жасырын» рецензиялаудан өткізу үшін екі тәуелсіз рецензиялаушыға береді. Тиісті білім саласында PhD, ғылым кандидаты немесе ғылым докторы дәрежесі және рецензияланатын мақаланың тақырыбы бойынша жарияланымдары бар мамандар қолжазбаға рецензия жазушы рөлін атқарады. Редакциялық алқаның мүшелері рецензиялаушы бола алады.
Рецензиялаушы осы Ереженің Қосымшасына сәйкес форма мен критерийлер бойынша қол қойылған рецензияны 5 жұмыс күні ішінде бас редактордың көмекшісіне ұсынады.

Рецензиялаушылар рецензияларды ұсынғаннан кейін, Бас редактордың көмекшісі отырыс күнін журналдың Бас редакторымен, жауапты редакторлармен және Редакциялық алқаның Төрағасымен келіседі, Редакцияның кезекті отырысын тағайындайды. Редакция отырыс кезінде барлық материалдарды қарайды және журналдың кезекті шығарылымында жариялауға арналған материалдардың түпкілікті тізімін бекітеді.
Материалды рецензиялау кезінде келіспеушілік туындаған жағдайда материалдарды жариялау туралы мәселе Редакция мүшелерінің ашық дауыс беруі арқылы шешіледі. Дауыстардың көпшілігі негізіндегі қарапайым әдіспен ақырғы шешім анықталады. Дауыстардың саны тең болса, Бас редактор шешуші пікірін білдіреді.

Журналға материалдарды ұсыну тәртібі және мақалаларға қойылатын талаптар
Ғылыми мақала, шолу Академия сайтында орналастырылған талаптарға сәйкес рәсімделеді.
Автор қол қойған ғылыми мақала, шолу Редакцияға электронды түрде ұсынылады.
Егер қолжазбалар қойылатын талаптарға сәйкес келмесе, Редакциялық алқа оларды қарастырмайды. Журналдың редакциясы жариялауға ұсынылған жұмыстан бас тарту құқығын өзіне қалдырады. Егер автор мақалаға тиісті түзетулер енгізсе, мақала жариялануы мүмкін. Журнал Редакциясы қабылдамаған мақалалар мен жіберілген құжаттар авторларға қайтарылмайды. Журнал редакциясы дәйексөздердің, заңнамаға сілтемелердің және авторлар туралы мәліметтердің дәлдігі үшін жауап бермейді. Журнал Редакциясының пікірі автордың ғылыми көзқарасымен сәйкес келмеуі мүмкін.

Журналдың жарияланатын материалдарында мемлекеттік, қызметтік немесе коммерциялық құпияға қатысты мәліметтерді қамтитын ғылыми және өзге де ақпарат болмауы тиіс. Авторлар материалдардың мазмұнына толық жауап береді, олар басқа баспа басылымдарында бұрын жарияланбауы керек. Журнал мақалаларында плагиат табылған авторлармен ынтымақтастықты тоқтатады.
Келіп түскен мақалалардың және оларға қоса берілетін материалдардың электрондық нұсқалары (қолжазбаның түпнұсқалығын тексеру туралы анықтама-есеп, рецензиялар) редакцияда бес жыл бойы сақталады.
Қайта басып шығару және дәйексөздер беру кезінде міндетті түрде Журналға сілтемелер енгізу қажет.

Қорытынды ережелер
Осы Ережеге енгізілетін өзгерістер мен толықтырулар Академия ректорының бұйрығымен бекітіледі.
Академияның Ғылыми кеңесі Журналды қайта ұйымдастыру және тарату туралы шешім қабылдайды. Журналдың шығарылымын тоқтату туралы шешім қабылданған жағдайда Академия сол атаумен оның шығарылымын қайта бастау құқығын өзіне қалдырады.